हिमालय अर्गनाइजेसन अन्तर्गतको हिमालय मोट्रक्स प्रालिले मनाङमा पिकअप सार्वजनिक गर्न लागेको हो । ‘म्याक्सस ईटेराेन ९ पिकअप’लाई काठमाडौंदेखि मनाङसम्मको यात्रासहित मनाङमा भव्य कार्यक्रमबीच सार्वजनिक गरिने जनाइएको छ ।
कठोर हिमाली भूभाग, चट्टानी बाटो र उच्च उचाइका कारण मनाङ नेपालकै चुनौतीपूर्ण अफरोड क्षेत्रमध्ये एक हो । यस्तो स्थानमा सफल परीक्षण र प्रदर्शन गरेर, कम्पनीले यो विद्युतीय पिकअपको डुअल मोटर फोरह्विल प्रणाली, एडाप्टिभ एयर सस्पेन्सन र सम्पूर्ण भू–भागमा सहज संचालन क्षमताको प्रमाण प्रस्तुत गर्ने तयारी गरेको छ ।
अत्याधुनिक फिचर्ससहित नेपालमा भित्रिएको यो पिकअपको मूल्यमा धेरैको चासो देखिएको छ । आयातकर्ता कम्पनीले हालसम्म मूल्य सार्वजनिक गरेको छैन । यद्यपि, आकर्षक मूल्यसहित पिकअप सार्वजनिक हुने बताइएको छ ।
एसएआइसी मोटर कर्पोरेसन अन्तर्गतको प्रतिष्ठित इलेक्ट्रिक ब्रान्ड म्याक्ससका सवारीहरू विश्वका ७० भन्दा बढी मुलुकहरूमा बिक्री हुँदै आइरहेको छ । उन्नत प्रविधि, भरपर्दो इन्जिनियरिङ र लक्जरी इलेक्ट्रिक सवारी विकासमा यो कम्पनीले विशिष्ट पहिचना स्थापित गरेको छ ।
नेपालमा हिमालय मोट्रक्सको माध्यमबाट विद्युतीय सवारीको दिगो भविष्यको जग बसाल्ने अभियान अघि बढाइएको कम्पनीले जनाएको छ ।
ईटेराेन पिकअपमा अगाडि १२५ किलोवाट र पछाडि २०० किलोवाटको मोटर छ, जसले ७०० एनएमको टर्क जेनेरेट गर्छ । यसले ५.८ सेकेन्डमा शून्य देखि १०० किलोमिटर प्रतिघण्टाको गति लिन सक्छ । यसको उच्चतम गति १९० किलोमिटर प्रतिघण्टा छ ।
ईटेराेन पिकअपमा १०२.२ किलोवाट आवरको एलएफपी ब्याट्री प्याक रहेको छ । यसले सिंगल चार्जमा एनईडीसी अनुसार अधिकतम ५६० किलोमिटर सम्मको रेन्ज दिन्छ । सो ब्याट्रीलाई फास्ट चार्जरमार्फत ४२ मिनेटरमा २० देखि ८० प्रतिशत सम्म चार्ज गर्न सकिन्छ ।